Lanta lidernan íntegro
Integridat ta algu ku últimamente a bira difísil pa nos enkontrá den nos pueblo, pero e ta algu ku ta impaktá tur área di nos bida personal i e bida di esnan rònt di nos. E echo aki ta algu hopi importante pa Dios i El a pone hopi promésa pa tur ku biba un bida íntegro. Integridat ta un akto di kurason; no ta kuestion di regla i lei. Si bo kurason ta korekto, henter bo kurpa ta kana den integridat.
Si e palabra no ta den bo kurason, esaki ta afektá tur parti di bo kurpa. Den salmo 15 David ta papia tokante di integridat. E ta puntra, O SEÑOR, ken por biba den Bo tabernakel? Ken por biba riba Bo seru santu. Anto ei e mes ta duna e kontestanan ku ta indiká ku biba den integridat ta di vital importansia pa un i tur. Pa e motibu ei mester forma hóbennan for di trempan pa nan ta hòmber i muhénan íntegro ku por biba, sirbi, i funshoná den Dios su presensia i den nos komunidat.


Ekipá i edifiká nos hóbennan
Konforme Mateo 28:18-20, Dios a duna e enkargo na Su iglesia pa bai i hasi nashonnan disipel di Hesus. Awor esnan ku e iglesia ta bai buska mester haña bon guia p’asina nan por ta disipelnan ku ta kana den e boluntat di Dios. Pa e motibu aki Dios a instituí e 5 ministerionan den Efesionan 4:12 i 13. E propósito di e apòstel, profeta, evangelista, pastor i siñadó (kual ta e 5 ministerionan) ta pa ekipá e santunan pa e trabou i pa edifiká e kurpa di Kristu. Pesei hóbennan mester wòrdu ekipá ku tur e hermèntnan ku nan tin mester p’asina nan por biba un bida ku ta agradá Dios i kuminsá kana den nan yamada. Ademas mester duna nan e preparashon p’asina nan por edifiká tantu nan mes komo e kurpa di Kristu ku E Palabra di Dios, siguiendo e instrukshon di E Spiritu Santu di Dios.

Kultivá hóbennan dinámiko ku por tuma e batuta ofer.
Tin biaha hóbennan tin e pensamentu ku nan ta muchu yòn pa por tuma e batuta di liderazgo ofer. Timoteo tabata un persona ku Dios a uza fo’i den su hubentut pa pastoriá. Pablo a bis’é den 1Timoteo 4:12 “No laga ningún hende menospresiá bo hubentut, ma mas bien den palabra, kondukta, amor, fe i puresa, demonstrá bo mes di ta un ehèmpel pa esnan ku ta kere”. Aki nos por mira klaramente ku Timoteo tabata un hóben ku a sa di tuma su responsabilidat (batuta) na serio.
Apesar ku e tabata hóben, esei no mester tabata un estorbo p’e, ma e mester a hasi bon uzo di su edat hóben p’asina e por ta dinámiko i na kandela pa Dios. Pesei mester kultivá hóbennan pa nan ta dinámiko i prepará nan meskos ku Timoteo pa tuma e batuta ofer i kore kuné na edat hóben.


Motiva hóbennan den nan yamada.
Hóbennan semper mester di motivashon. Nos mester siña e hóbennan pa konosé e yamada ku Dios tin pa nan, i nos mester instruínan kon pa kana den nan yamada. Nos no por neglishá esaki. I konforme 1Tim.4:12, nos no mester menospresiá nos hóbennan, pero nos mester ta esnan ku ta motivá i enkurashá nan pa nan por hasi e trabou ku Dios ta yama nan pa hasi sin entregá ni fatigá, pero perseverando te na final.
 
 
 
 
Dinámiko